ഗേ ആളുകളോട് ഉള്ള (ഇസ്‌ലാമിക് ക്രിസ്ത്യൻ മതനിയമങ്ങളുടെ അടിസ്ഥാനത്തിൽ ഉള്ള) വെറുപ്പ് ന്റെ പശ്‌ചാത്തലത്തിൽ 'പ്രകൃതി'യെപ്പറ്റി ചർച്ച ചെയ്യുമ്പോൾ ഏറ്റവും ആദ്യം മനസിലാക്കേണ്ട അടിസ്ഥാന വിഷയങ്ങളിൽ ഒന്ന് സെക്ഷ്വൽ ഓറിയെന്റേഷൻ (ലൈംഗികാഭിമുഖ്യം) പിന്നെ ലിംഗാവസ്ഥ അഥവാ ജെൻഡർ എന്നിവയാണ്.
(മതം പറയുന്നതല്ലാത്ത ഒന്നും ഞാൻ വിശ്വസിക്കില്ല എന്നതാണ് നിങ്ങളുടെ മനോഭാവം എന്നുണ്ടെങ്കിൽ തുടർന്ന് വായിക്കേണ്ടതില്ല)
എന്താണ് പ്രകൃതി എന്നും എന്തൊക്കെയാണ് പ്രകൃതിയിലെ വൈവിധ്യങ്ങൾ എന്നും തുടങ്ങിയ കാര്യങ്ങളിൽ അറിവില്ലാത്തതുകൊണ്ടാണ് പ്രകൃതിവിരുദ്ധം എന്ന പ്രയോഗം ഈ വിഷയവുമായി ബന്ധപ്പെട്ട ചർച്ചകൾക്കിടയിൽ സ്ഥിരമായി ഉന്നയിക്കപെടുന്നത്. പ്രകൃതിയെപ്പറ്റിയും അതിലെ വൈവിധ്യങ്ങളെപ്പറ്റിയും അറിയില്ല എന്നതിന്റെ അർത്ഥം അതൊന്നും നിലനിൽക്കുന്നില്ല എന്നല്ല, നിങ്ങൾക്ക് അറിയില്ല എന്ന് മാത്രമാണ്.
ആധുനികവൈദ്യശാസ്ത്ര പ്രകാരം സ്വവർഗാനുരാഗം (homosexuality) എന്നത് എതിർവർഗാഭിമുഖ്യം (heterosexuality) ദ്വിലിംഗാഭിമുഖ്യം (bisexuality) സർവലിംഗാഭിമുഖ്യം (pansexual) എന്നിവ പോലെയുള്ള ഒരു ലൈംഗിക ആഭിമുഖ്യം അഥവാ സെക്ഷ്വൽ ഓറിയെന്റേഷൻ ആണ്.
എതിർവർഗാഭിമുഖ്യം എന്നുവെച്ചാൽ ആണിന് പെണ്ണിനോടും തിരിച്ചും ഉള്ള ആകർഷണം, ദ്വിലിംഗാഭിമുഖ്യം എന്നാൽ രണ്ട് ലിംഗത്തിൽ പെട്ടവരോടും ആകർഷണം തോന്നുന്നവർ. പാൻസെക്ഷ്വൽ എന്നാൽ ആണ്, പെണ്ണ്, ട്രാൻസ്ജെന്റർ, ഇന്റർസെക്‌സ്, ജെന്റർഫ്ലൂയിഡ് എന്നിങ്ങനെയുള്ള എല്ലാ ലിംഗാവസ്ഥകളിലും പെട്ടവരോട് ആകർഷണം തോന്നുന്ന ആളുകൾ. (ഇതൊക്കെ എന്താണ് എന്നത് വിശദമായി അറിയാൻ ഗൂഗിളിൽ തിരഞ്ഞു നോക്കുക)
ഇവയിൽ ഏറ്റവും കൂടുതൽ ആളുകൾക്ക് പരിചയമുള്ളത് എതിർലിംഗാഭിമുഖ്യം ആണ്. ബാക്കിയുള്ളവയെപ്പറ്റി ബോധ്യമില്ല എന്നതുകൊണ്ട് അവയൊന്നും നിലവിലില്ല എന്നോ എനിയ്ക്ക് അറിയാത്തതൊക്കെ പ്രകൃതിയ്ക്ക് നിരക്കാത്തതാണ് എന്നോ രോഗമാണ് എന്നോ വൈകല്യമാണ് എന്നോ പറയാൻ പറ്റില്ല. നിങ്ങൾക്ക് ശരിയാണ് എന്ന് 'തോന്നുന്നവ' മാത്രമാണ് ശരി എന്നും ആകുന്നില്ല, നിങ്ങളുടെ മതപുസ്തകത്തിൽ പറഞ്ഞതാണ് ശരി എന്നും ആകുന്നില്ല.
പ്രകൃതിയിൽ ഹോമോസെക്ഷ്വൽ ആയ ഒരു ജീവിയും ഇല്ല എന്നതാണ് ഞങ്ങളെപ്പറ്റി പറഞ്ഞു തുടങ്ങുമ്പോൾ ആദ്യമേ അവതരിപ്പിക്കുന്ന ഒരു നുണ. അത് അറിവില്ലായ്മയും വിഡ്ഢിത്തരവുമാണ്, ദേ ഇതിലെ ഓരോ വീഡിയോയും നോക്കുക https://m.youtube.com/playlist?list=PLkabqKbOJMGdOZbB3CsQxUzeJw7b-A7zh മനുഷ്യർ അടക്കം 1500ലേറെ സ്പീഷീസുകളിൽ നിലനിൽക്കുന്നതായി ശാസ്ത്രം നിരീക്ഷിച്ച ഒരു സവിശേഷതയാണ് സ്വവർഗാനുരാഗം.
ഹോമോസെക്ഷ്വൽ ആയ ജീവികൾ സ്വന്തം ലിംഗത്തിൽ പെട്ട ജീവികളുടെ കൂട്ടാണ് ഇഷ്ടപ്പെടുന്നത്. അവർക്ക് തുണയായി പ്രകൃതി അവരെപ്പോലെ ഉള്ളവരെ സൃഷ്ടിച്ചിട്ടുണ്ട്. ഇതേ പോലെ എതിർലിംഗ താല്പര്യം ഉള്ളവർക്കും ബൈസെക്ഷ്വൽ ആയവർക്കും അവരവർക്കൊത്ത പങ്കാളികളെ പ്രകൃതി സൃഷ്ടിച്ചിട്ടുണ്ട്
ഗേ ആണിന് ഗേ (അല്ലെങ്കിൽ ബൈസെക്ഷ്വൽ ആയ) ആണിനേയും, ഹെറ്ററോസെക്ഷ്വൽ ആണിന് അതിനൊത്ത പെണ്ണിനെയും, ലെസ്ബിയൻ പെണ്ണിന് അതിനൊത്ത പെണ്ണിനേയും, ബൈ സെക്ഷ്വൽ പെണ്ണിന് അതിനൊത്ത ആണിനെ അഥവാ പെണ്ണിനേയും പ്രകൃതി സൃഷ്ടിച്ചിട്ടുണ്ട്. ട്രാൻസ് ആളുകൾക്കും അവർക്കൊത്ത ഇണകളെ പ്രകൃതി സൃഷ്ടിച്ചിട്ടുണ്ട്. അതായത് പ്രകൃതി പൂർണമാണ്, ചേരേണ്ടത് തമ്മിൽ ചേരുന്നതിനെ തടയുന്ന രീതിയിൽ ഉള്ള 'പ്രകൃതി വിരുദ്ധ' വാദികളാണ് പ്രായോഗിക തലത്തിലെ 'യഥാർത്ഥ പ്രകൃതി വിരുദ്ധർ'
പ്രകൃതി മനുഷ്യനെ ആണും പെണ്ണുമായി സൃഷ്‌ടിച്ചു എന്ന് പറയുന്നത് ട്രാൻസ്ജെന്റർ, ഇന്റർസെക്ഷ്വൽ, ജെന്റർഫ്ലൂയിഡ് എന്നിങ്ങനെയുള്ള വിവിധ ആണ്-പെണ്ണ് ഇതര (നോൺ ബൈനറി) ലിംഗ വൈവിധ്യങ്ങളെപ്പറ്റി അറിയാത്തത്കൊണ്ടാണ്.
ആണും പെണ്ണും എന്ന ബൈനറി മാത്രമേ ഞാൻ വിശ്വസിക്കൂ എന്ന് പറയുന്നവർ നിഷേധിക്കുന്നത് പ്രകൃതിയുടെ സ്വാഭാവികതയെ തന്നെയാണ്.
പ്രകൃതിവിരുദ്ധ വിവാഹം എന്ന വാദക്കാരോട്: നിങ്ങളുടെ 'പ്രകൃതിവിരുദ്ധത' ലോജിക് വെച്ച് തന്നെ ചിന്തിച്ചു നോക്കിയാൽ വിവാഹമെന്ന ഏർപ്പാട് തന്നെ പ്രകൃതിവിരുദ്ധമാണ്. പ്രകൃതിയിൽ ഏതെങ്കിലും ജീവി വിവാഹം ചെയ്ത് ഭാര്യയെ ഭരിച്ചു ജീവിതം നയിക്കുന്നുണ്ടോ?
പ്രകൃതിയല്ല മനുഷ്യരാണ് വിവാഹം എന്ന സ്ഥാപനം ഉണ്ടാക്കിയത്.
ഗേ ആളുകൾ എല്ലാവരെയും ഗേ ആകാൻ പ്രേരിപ്പിക്കുന്നു എന്നതും ബോധപൂർവം യാഥാസ്ഥിതികർ പറഞ്ഞു പരത്തുന്ന നുണയാണ്. ഓരോ മനുഷ്യനും സ്വന്തം സ്വത്വത്തെ ഉൾക്കൊണ്ട് തൃപ്തിയായി ജീവിക്കാൻ കഴിയണം (be who you are) എന്നുള്ളതാണ് ഞങ്ങൾ മുന്നോട്ടു വെക്കുന്ന ആശയം. അതിന്റെ അർത്ഥം ഒരിക്കലും അതല്ല.
ഗേ ആളുകൾ സമൂഹത്തെ തകർക്കുന്നു എന്നതും സ്ഥിരമായി മതവാദികൾ ആവർത്തിക്കുന്ന നുണ ബോംബാണ്. ഗേ ആളുകൾ മുന്നോട്ടു വെക്കുന്ന ആശയം സ്നേഹവും സമത്വവുമാണ്, അത് സമൂഹത്തെ കൂടുതൽ ചേർത്തു നിർത്തുകയേ ഉള്ളൂ.
ആണ് പെണ്ണ് എന്ന് വേർതിരിച്ചു വെച്ചുകൊണ്ടും സ്ത്രീകളെ രണ്ടാം തരക്കാരാക്കിക്കൊണ്ടും ഉള്ള സാമൂഹ്യക്രമത്തെ ഞങ്ങൾ തള്ളിക്കളയുന്നുണ്ട് എന്നതാണ് സ്ത്രീ വിരുദ്ധത മുഖംമുദ്രയാക്കിയ മതവാദകരുടെ പ്രധാന ആശങ്ക. പുരുഷാധിപത്യബോധം തകരേണ്ടത് തന്നെയാണ്, ലിംഗഭേദമന്യേ ലോകം എല്ലാവർക്കുമുള്ളതാണ്. ആ രീതിയിൽ ലോകത്തെ പുനർ നിര്വചിക്കുക എന്നതാണ് ഞങ്ങൾ ചെയ്യുന്നത്. സ്ത്രീവിരുദ്ധവും ക്വീർ വിരുദ്ധവും ആയ ലോകക്രമം മാറ്റപ്പെടേണ്ടത് തന്നെയാണ്. ആവർത്തിച്ചു പറയട്ടെ, ലോകം എല്ലാവർക്കുമുള്ളതാണ്.
